Mynegai o Gwestiynau Cyffredin

Mae hawl diffynnydd i gael treial gan reithgor am rai mathau o droseddau yn un hen iawn. Cydnabyddir mai'r ffordd decaf o ddewis rheithgor yw ar hap o'r gofrestr etholwyr. Dyma paham eich bod wedi cael eich dewis. Mae derbyn gwŷs yn golygu bod gofyniad cyfreithiol arnoch i fynd i'r llys ar y dyddiad a nodwyd, ar yr amod eich bod yn gymwys i wasanaethu fel rheithiwr, neu fod gennych reswm da dros gael eich esgusodi neu i'ch gwasanaeth gael ei ohirio.

Yr ydych chi a gweddill y rheithgor yn chwarae rôl bwysig iawn mewn treial. Daw rheithwyr o groestoriad o gymdeithas a gofynnir iddynt gymryd agwedd ddiduedd tuag at yr achos, fel y gellir cynnal treial teg. Fel arfer bydd 12 person ar reithgor, a'ch tasg yw ystyried y dystiolaeth a dod i benderfyniad a yw'r diffynnydd yn euog neu'n ddieuog.

I wasanaethau fel rheithiwr, rhaid i chi:

• fod o leiaf yn 18 oed, a than 70 oed, ar y diwrnod y byddwch yn cychwyn eich gwasanaeth rheithgor
• bod wedi'ch cofrestru i bleidleisio mewn etholiadau seneddol neu lywodraeth leol
• bod wedi byw yn y Deyrnas Unedig, Ynysoedd y Sianel neu Ynys Manaw am unrhyw gyfnod o 5 mlynedd o leiaf ers i chi fod yn 13 oed.

Nid ydych yn gymwys:

• os byddwch dan 18 oed neu dros 70 oed ar y dyddiad pryd yr ydych i fod i gychwyn eich gwasanaeth rheithgor
• os ydych ar hyn o bryd ar fechnïaeth mewn achos troseddol
• os ydych wedi'ch dedfrydu fel y disgrifir yn y wybodaeth 'Pwy sy'n gymwys' (gweler y dogfennau ar y dde)
• os oes gennych, neu y bu gennych yn y gorffennol salwch meddyliol, anhwylder seicotig, anfantais feddyliol neu anfantais feddyliol ddifrifol fel y disgrifir yn y wybodaeth 'Pwy sydd ddim yn gymwys' (gweler y dogfennau ar y dde)
• os nad ydych wedi byw yn y Deyrnas Unedig, Ynysoedd y Sianel neu Ynys Manaw am un cyfnod o 5 mlynedd o leiaf ers i chi fod yn 13 oed
• Os nad ydych yn gymwys i bleidleisio mewn etholiadau seneddol neu etholiad awdurdod lleol.

Gallwch gael eich esgusodi os ydych wedi bod ar wasanaeth rheithgor yn ystod y ddwy flynedd ddiwethaf. Hefyd gallwch gael eich esgusodi os ydych chi wedi bod yn rheithiwr a bod y llys wedi eich esgusodi am gyfnod na ddaeth i ben eto. Bydd angen i chi ddangos tystiolaeth o hyn i'r Swyddfa Ganolog Gwysio Rheithgor.

Gallwch gael eich esgusodi os ydych chi'n aelod llawn-amser o luoedd morol, milwrol neu awyrlu Ei Mawrhydi, ac os bydd eich prif swyddog yn cadarnhau y byddai eich absenoldeb yn niweidiol i effeithlonrwydd y gwasanaeth.

Gallwch gael eich esgusodi am resymau meddygol. Ni ddylech gael tystysgrif feddygol ond os gofynnir i chi ddarparu un gan y Swyddfa Ganolog Gwysio Rheithgor.

Efallai fod gennych resymau personol paham yr hoffech gael eich esgusodi. Os felly bydd angen i chi ddarparu gwybodaeth yn ysgrifenedig, i'r Swyddfa Ganolog Gwysio Rheithgor gan ddatgan paham na allwch fynychu o fewn y flwyddyn nesaf.

Cewch hawlio lwfans ar gyfer:

• colli enillion neu fudd-daliadau
• ffioedd ar gyfer gofalwyr neu warchodwyr plant y mae'n rhaid i chi dalu amdanynt oherwydd gwasanaeth rheithgor
• taliadau eraill a gyfyd yn uniongyrchol o ganlyniad i wasanaeth rheithgor.

Ni chewch hawlio ond hyd at y swm a enillwch fel arfer, ynghyd â gofal plant a threuliau eraill a gyfyd yn benodol o ganlyniad i'ch gwasanaeth rheithgor. Ni all cyfanswm y swm sy'n daladwy gan y llys fod yn fwy nag uchafswm y lwfans ar gyfer colled ariannol a nodir ar y daflen lwfansau. Rhaid i chi ddarparu tystiolaeth i brofi faint y byddech wedi'i ennill a beth a wariwyd gennych.

Pan fyddwch yn cadarnhau eich gwasanaeth rheithgor, anfonir pecyn gwybodaeth atoch yn cynnwys Tystysgrif Colli Enillion Cyflogwr. Bydd angen i'r person sy'n talu i chi lenwi'r ffurflen hon a rhaid ei chyflwyno i'r rheolwr rheithgor ynghyd â'r daflen treuliau a roddir i chi ar ddiwrnod cyntaf eich gwasanaeth rheithgor.

Rhaid i'ch cyflogwr un ai:

• stampio'r dystysgrif gyda'i stamp busnes swyddogol, neu
• roi ynghlwm bapur cyfarch neu ddalen o bapur pennawd gwreiddiol gydag enw a chyfeiriad y busnes wedi'i argraffu arno, neu
• ddarparu rhyw dystiolaeth arall o'r busnes y gall y llys ei gadw.

Bydd yn rhaid i chi ddarparu peth tystiolaeth i'r llys eich bod wedi colli enillion, er enghraifft, llythyr gan eich cyfrifydd. Os nad oes gennych gyfrifydd, gallai ffurflen dreth y flwyddyn flaenorol fod yn dderbyniol. Os credwch y bydd yn rhaid i chi dalu i gael y dystiolaeth gan eich cyfrifydd, ceisiwch gyngor gan y rheolwr rheithgor yn gyntaf, os gwelwch yn dda.

Pan fyddwch yn cadarnhau eich gwasanaeth rheithgor, anfonir pecyn gwybodaeth atoch yn cynnwys Tystysgrif Colli Enillion. Bydd angen i chi ei dangos i'r swyddfa budd-dal diweithdra neu'r swyddfa nawdd cymdeithasol sy'n talu'ch budd-dal, a byddant hwy'n dweud wrthych sut y mae gwasanaeth rheithgor yn effeithio ar eich hawliad. Os byddwch yn colli budd-dal oherwydd gwasanaeth rheithgor, byddant yn llenwi'r dystysgrif ac yn ei rhoi yn ôl i chi. Deuwch â'r dystysgrif gyda chi i'r llys ar eich diwrnod cyntaf gan y byddwch ei hangen i hawlio'n ôl y budd-dal yr ydych wedi'i golli.

Yr ydych yn gymwys i hawlio Lwfans Ceisio Gwaith am hyd at 8 wythnos o wasanaeth rheithgor (cofiwch y disgwylir i'ch cyfnod o wasanaeth rheithgor barhau fel arfer am hyd at 2 wythnos). Os ydych chi ar Lwfans Ceisio Gwaith yn seiliedig ar gyfraniadau, rhaid i chi gael Tystysgrif Colli Enillion wedi'i llofnodi gan y swyddfa budd-daliadau a bydd y llys yn talu'r budd-dal. Os ydych ar Lwfans Ceisio Gwaith yn seiliedig ar incwm, rhaid i chi hawlio Cymhorthdal Incwm am eich cyfnod ar wasanaeth rheithgor.

Gallwch hawlio am daliadau ychwanegol y mae'n rhaid i chi eu gwneud i ofalwr neu warchodwr plant o ganlyniad i'ch gwasanaeth rheithgor, ar yr amod nad yw eich hawliad dyddiol am golled ariannol yn uwch na'r uchafswm a bennwyd drwy gyfraith.

Cewch hawlio'r canlynol:

• costau teithio
• lwfans cynhaliaeth
• colli enillion/budd-daliadau
• lwfans am golled ariannol arall.

Os bydd rhaid i chi wneud taliadau eraill oherwydd gwasanaeth rheithgor, cewch hawlio'r rhain. Rhaid i chi ddarparu derbynneb i'r llys, neu lythyr wedi'i lofnodi, sy'n nodi'r symiau ac yn egluro am beth y gwnaed y taliadau. Efallai y gofynnir i chi hefyd paham y bu'n rhaid i chi wneud y taliad.

Cewch hawlio mwy nag un math o gostau, ond ni all cyfanswm y gall y llys ei dalu fod un uwch nag uchafswm y lwfans ar gyfer colled ariannol. Bydd y symiau hyn yn newid o dro i dro a rhoddir gwybod i chi beth yw'r cyfraddau cyfredol yn y daflen lwfansau a dderbyniwyd gyda'ch gwŷs rheithgor ac yn ddiweddarach gyda'ch pecyn cadarnhau.

Cewch hawlio cost taith ddwyffordd rhwng eich cartref a'r llys.

Gallwch hawlio pris tocyn dwyffordd safonol. Rhaid i chi gymryd y llwybr mwyaf uniongyrchol i'r llys.

Telir lwfans i chi yn seiliedig ar y nifer o filltiroedd a deithiwyd gennych. Bydd disgwyl i chi ddefnyddio'r llwybr mwyaf uniongyrchol i gyrraedd y llys.

Gallwch hawlio am unrhyw gyfuniad o ddulliau teithio a restrir, ar yr amod eich bod yn defnyddio'r llwybr mwyaf uniongyrchol i gyrraedd y llys.

Mewn argyfwng, neu lle nad oes bws na thrên y gallech eu defnyddio, gallai'r llys dalu cost tacsi, ond holwch y llys yn gyntaf bob amser. Os bydd y llys yn cytuno i dalu'r gost, rhaid i chi gael derbynneb gan y gyrrwr.

Cysylltwch â'r rheolwr rheithgor yn eich llys lleol i weld a ganiateir i chi gyfrifo faint o'r cerdyn sydd yn cynnwys eich gwasanaeth rheithgor a hawlio'r swm hwnnw.

Oes. Rhaid i chi gadw derbynebau am eich teithio er mwyn hawlio'n ôl eich treuliau. Mae'r drefn yn amrywio o lys i lys, a rhoddir gwybod i chi am hyn ar eich diwrnod cyntaf yn y llys.

Cewch hawlio lwfans tuag at gost bwyd a diod tra yr ydych yn y llys. Y mae'r lwfans a delir yn swm penodol ac yn dibynnu ar ba mor hir y mae'n rhaid i chi fod oddi cartref neu o'ch gwaith am bob diwrnod o'ch gwasanaeth rheithgor. Fe welwch y swm yn y daflen lwfansau.

Rhoddir ffurflen hawlio treuliau i chi ar y diwrnod cyntaf. Bydd eich rheolwr rheithgor yn dweud wrthych sut i'w llenwi a pha bryd i'w rhoi i mewn.

Fel arfer, bydd y llys yn trefnu i'ch treuliau gael eu talu'n uniongyrchol i'ch cyfrif banc. Os bydd hyn yn anodd i chi, mynnwch air â'r rheolwr rheithgor ar eich diwrnod cyntaf.

Byddwch yn cael eich talu cyn pen pum diwrnod gwaith o derfyn eich gwasanaeth rheithgor. Os bydd hyn yn anodd i chi, mynnwch air â'r rheolwr rheithgor ar eich diwrnod cyntaf. Os byddwch yn gwasanaethu ar dreial hir, gwneir trefniadau arbennig.

Fel arfer, bydd gwasanaeth rheithgor yn parhau am 10 diwrnod gwaith. Os bydd treial yn debygol o barhau'n hwy na hynny, bydd y llys yn gofyn a fyddai hynny'n anodd i chi.

Os ydych chi'n rhedeg yn hwyr, ffoniwch y rheolwr rheithgor cyn gynted â phosibl. Y mae'n bwysig iawn eich bod yn caniatáu digon o amser ar gyfer eich taith, gan fod llawer o bobl yn gysylltiedig â'r treial, ac mae oedi'n gostus.

Pan gyraeddwch, bydd eich bagiau chi, ac eraill sy'n cyrraedd y llys yn cael eu harchwilio gan warcheidwad diogelwch. Yna anfonir chi i fan aros y rheithgor, lle y cymerir eich enw.

Bydd fel arfer yn digwydd yn y Llys y Goron sydd agosaf at eich cartref. Yn achlysurol, bydd angen rheithwyr mewn llysoedd sifil, yr Uchel Lys a'r llys sirol. Arweiniad i Lys y Goron yw hwn - os dewisir chi i wasanaethu mewn llys sirol dywedir wrthych am y gwahaniaethau rhwng llysoedd sifil a Llys y Goron pan fyddwch yn mynychu.

Pan gyraeddwch bob bore, ewch ar unwaith i fan aros y rheithgor, nid i ystafell y llys nac unrhyw ran arall o'r adeilad.

Na - ni fyddwch yn gwybod hyd nes y byddwch wedi tyngu llw ar reithgor. Byddwch yn gwasanaethu ar dreialon ar gyfer achosion troseddol mwy difrifol megis lladrata, byrgleriaeth a throseddau'n ymwneud a chyffuriau ac, yn llawer llai aml, trais, llofruddiaeth a thwyll.

Nid oes unrhyw reol gaeth ynglŷn â gwisg, ond dillad anffurfiol trwsiadus yw'r dewis gorau. Byddwch yn eistedd i lawr am gyfnod hir, felly gwisgwch ddillad yr ydych yn teimlo'n gyfforddus ynddynt.

Cofiwch ddod â'r canlynol:

- tudalennau 1 a 2 eich gwŷs rheithgor

- UN o'r mathau canlynol o adnabyddiaeth:

   - Pasbort yn eich enw llawn cyfredol, NEU
   - Cerdyn Adnabod Cenedlaethol y DU, NEU
   - Dogfennau gan y Swyddfa Gartref yn cadarnhau
      statws mewnfudo i'r DU, NEU
   - Trwydded yrru (fersiwn newydd gyda llun os yn bosibl) NEU

- UNRHYW DDAU o'r canlynol

   -  Tystysgrif Geni (a gyhoeddwyd i fewn 6 wythnos i'ch geni); NEU
   - Cerdyn Credyd gyda thri datganiad a phrawf o lofnod, NEU
   - Llyfr siec a cherdyn banc gyda 3 datganiad a phrawf o lofnod,
     NEU
   - 3 bil gan y prif wasanaethau yn dangos yr enw a'r cyfeiriad cywir.

- Tystysgrif Colli Enillion wedi'i llenwi, ac wedi cael ei llofnodi gan eich
  cyflogwr (os oes angen)

- Tystysgrif Colli Budd-dal wedi'i llenwi, ac wedi'i llofnodi gan eich
  swyddfa budd-daliadau (os oes angen)

- rhywbeth i'w ddarllen neu i'w wneud, gan eich bod yn debygol o
  dreulio llawer o amser yn aros i gael eich galw i wasanaethu
  ar dreial.

Cewch, fe gewch chi ddefnyddio'ch ffôn symudol a'ch cyfrifiadur yn y man aros, ond bydd yn rhaid i chi holi eich llys lleol a oes loceri ar gael i'w cadw'n ddiogel. Am resymau diogelwch, ni chaniateir stereos personol, ffonau symudol, recordydd tâp nac unrhyw offer electronig arall yn ystafell y llys. Oni ddarperir loceri, bydd yn rhaid i reithwyr gadw eitemau o'r fath gyda hwy a sicrhau eu bod wedi eu troi i ffwrdd tra yn ystafell y llys. Os oes unrhyw amheuaeth gennych, holwch ymlaen llaw, gan na all y llys fod yn gyfrifol am eu cadw'n ddiogel.

Nid oes unrhyw gyfleusterau gwarchod plant mewn llysoedd. Cewch hawlio unrhyw daliadau ychwanegol y bydd yn rhaid i chi eu gwneud i ofalwr neu warchodwr plant o ganlyniad i'ch gwasanaeth rheithgor, ar yr amod nad yw eich hawliad dyddiol yn mynd y tu hwnt i'r uchafswm a bennwyd gan y gyfraith.

Cysylltwch â'ch llys i weld a allant drefnu ymweliad. Mae rhai pobl yn ei chael yn ddefnyddiol i weld awyrgylch y llys a'r cyfleusterau yno cyn dechrau ar wasanaeth rheithgor.

Hyd at wythnos cyn eich gwasanaeth rheithgor, cysylltwch â'r Swyddfa Ganolog Gwysio Rheithgor.

Un wythnos neu lai cyn y bydd eich gwasanaeth rheithgor i fod i ddechrau, cysylltwch â'r rheolwr rheithgor yn y Llys y Goron y gofynnwyd i chi ei fynychu. Fe welwch y rhif ar y daflen wybodaeth leol a anfonwyd atoch gyda'r llythyr yn cadarnhau eich gwasanaeth (neu ewch i 'Manylion Llys Lleol).

Gellir cael mwy o wybodaeth am Wasanaeth Llysoedd Ei Mawrhydi'n gyffredinol ar: www.hmcourts-service.gov.uk.

Bob amser, ar wahân i'r adeg y byddwch yn ystafell y llys, byddwch chi a gweddill y rheithgor yn cael eich cadw ar wahân i bobl eraill yn y llys, ac eithrio'r tywyswyr. Byddwch yn cymysgu â rheithwyr o dreialon eraill yn y man aros ond rhaid i chi gofio peidio â thrafod manylion eich treial chi gydag unrhyw reithwyr nad ydynt ar y treial hwnnw, na phan fyddwch mewn man cyhoeddus.

Ni fyddwch yn gwybod ar ba dreial y byddwch yn gwasanaethu hyd nes y byddwch wedi tyngu llw. Hyd yn oed pan eir â chi i fyny i ystafell llys, efallai na chewch eich dewis ar gyfer yr achos hwnnw.

Mae'n amhosibl dweud. Bydd yn dibynnu ar ddigwyddiadau'r dydd os cewch eich galw i wasnaethu ar reithgor yn sydyn, neu o gwbl. Gall treialon gymryd mwy o amser na'r disgwyl ac weithiau efallai na fydd achos yn barod i fynd i'r llys. Os bydd diffynnydd yn pledio'n euog ar y funud olaf, nid oes angen i'r treial gael ei gynnal.

Eir â 15 o bobl i fyny i'r llys i ddangos i'r llys bod 12 o bobl yn cael eu dewis ar hap o blith y grŵp hwn. Pan ddisgwylir i achos barhau am fwy na phythefnos, eir â grŵp mwy o bobl i fyny i'r llys, gan y bydd rhai pobl yn methu â gwasanaethu ar reithgor am gyfnod mor hir â hynny.

Os byddwch, ar unrhyw adeg, yn adnabod y diffynnydd neu unrhyw un arall sy'n gysylltiedig â'r treial, dywedwch wrth dywysydd ar unwaith drwy basio nodyn iddynt. Dylech ddweud wrthynt, hyd yn oed os ydych o'r farn na fydd yn effeithio ar eich dyfarniad - os cewch chi eich adnabod gan unrhyw un yn ystafell y llys fe allent hawlio bod yr achos yn un annheg a gofyn i chi gael eich anfon ymaith.

Mewn rhai achosion, megis twyll, bydd cwmnïau penodol megis banciau, cymdeithasau adeiladu neu gwmnïau yswiriant yn cael eu rhestru yn yr achos. Gofynnir i chi ddweud wrth y barnwr os oes gennych chi, aelod o'ch teulu neu ffrind agos gysylltiad â'r cwmni. Os oes gennych, efallai y gofynnir i chi dynnu'n ôl o wasanaeth rheithgor ar yr achos hwn.

Fe allech chi neu aelod arall o'ch rheithgor gael eich herio gan yr erlyniad neu'r amddiffyniad. Mae hyn fel arfer os bydd rhywun yn ystafell y llys yn adnabod rheithiwr. Os bydd y barnwr yn caniatau'r her, bydd yn rhaid i chi adael bocs y rheithgor a bydd clerc y llys yn galw rhywun arall i gymryd eich lle. Bydd un o swyddogion y llys yn mynd â chi yn ôl i'r man aros ac efallai y cewch eich rhyddhau ar gyfer treial mewn llys arall. Peidiwch â phryderu os digwydd hyn; y mae'n hynod bwysig sicrhau treial teg i'r diffynnydd.

Drwy dyngu llw yr ydych yn gwneud ymrwymiad cyfreithiol i wneud eich gorau i gyflawni swyddogaeth rheithiwr a chymryd rhan weithredol yn y gwaith o ddarparu dedfryd deg i'r diffynnydd.

Byddwch yn gwneud hyn drwy ddal Llyfr sanctaidd yn eich llaw tra byddwch yn adrodd geiriau'r llw, mae cardiau llwon a llyfrau sanctaidd ar gael ar gyfer sawl crefydd. Os ydych chi eisiau tyngu llw ar lyfr ar wahân i Destament Newydd y Beibl, dywedwch wrth swyddog y llys (y tywysydd fel arfer) cyn gynted ag y gallwch. Bydd y cerdyn llw neu'r llyfr sanctaidd wedyn yn cael ei ddarparu ar eich cyfer.

Cewch ofyn am gadarnhau os nad ydych eisiau tyngu llw ar lyfr sanctaidd. Mae geiriau'r cadarnhad yn debyg iawn i lw a'r un ystyr sydd iddynt, ond ni ofynnir i chi ddal llyfr sanctaidd yn eich llaw wrth siarad.

Byddwch yn eistedd ym mocs y rheithgor (fe'i gelwir weithiau'n fainc y rheithgor). Unwaith y byddwch wedi tyngu llw, byddwch bob amser yn eistedd yn yr un lle yn y bocs rheithgor.

Mae'r proffesiwn cyfreithiol yn gwybod nad yw aelodau rheithgor yn gyfarwydd â'r hyn sy'n mynd ymlaen mewn llys. Byddant yn sicrhau eu bod yn mynegi popeth mewn modd y gallwch chi ei ddeall gan mai chi a'ch cyd-reithwyr fydd yn penderfynu ar ddyfarniad yr achos. Os bydd gennych unrhyw broblem, gallwch ofyn am eglurhad drwy basio nodyn i'r barnwr drwy glerc y llys neu'r tywysydd.

Nid ydynt yn moesymgrymu i'r barnwr. Maent yn moesymgrymu i arfbais y Frenhines sydd uwchben y barnwr er mwyn dangos parch i gyfiawnder y Frenhines.

Cewch. Os nad oes eich angen ar gyfer treial ar ddiwrnod penodol a bod modd i chi ddychwelyd i'r gwaith, rhaid i chi wneud hynny. Os nad oes modd i chi ddychwelyd i'r gwaith rhaid i chi hysbysu'r llys ar eich diwrnod cyntaf o wasanaeth a dylai eich cyflogwr lenwi'r ffurflen colli enillion. Os methwch â gwneud hyn, gallai effeithio ar y golled enillion y gall y llys ei thalu.

Os na fydd eich angen ar unrhyw adeg yn ystod eich gwasanaeth rheithgor, dywedir wrthych pryd nesaf y dylech fod yn bresennol yn y llys. Nid y diwrnod canlynol fydd hynny o reidrwydd, felly sicrhewch eich bod yn gwrando'n ofalus ar unrhyw gyfarwyddiadau.

Os caniateir i chi ddychwelyd i'r gwaith peidiwch â thrafod manylion unrhyw dreial gydag unrhyw un - cofiwch y byddwch dan lw o hyd, hyd yn oed pan fyddwch y tu allan i ystafell y llys.

Eir â chi i ystafell y rheithgor lle y byddwch yn trafod y dystiolaeth a gyflwynwyd i chi yn ystod y treial. Rhaid i'r rheithgor ddewis llefarydd a fydd yn cyflwyno'r ddedfryd i'r llys. Gelwir yr unigolyn yn benrheithiwr.

Dim ond y canlynol:

• unrhyw nodiadau a wnaed gennych yn ystod y treial
• copi o'r ditiad, sef rhestr o droseddau y cyhuddwyd y diffynnydd ohonynt
• unrhyw arddangosion a gyflwynwyd yn ystod y treial, y caniatawyd i chi fynd â hwy.

Efallai y bydd y barnwr yn dedfrydu ar unwaith, ond weithiau bydd yn gofyn i'r Gwasanaeth Prawf Cenedlaethol ddarparu adroddiadau cyn dedfrydu. Yn yr achos hwnnw, gallai sawl wythnos fynd heibio cyn y gall barnwr benderfynu pa ddedfryd i'w rhoddi. Os ydych eisiau gwybod canlyniad achos, gallwch gysylltu â'r llys y diwrnod ar ôl y dyddiad a bennwyd ar gyfer dedfrydu yn yr achos.

Ar rai achlysuron, gallai manylion achosi trallod. Os byddwch chi'n teimlo'n ofidus yn ystod neu ar ôl treial, gofynnwch am gael gair yn gyfrinachol gyda'r rheolwr rheithgor. Byddant yn falch o roi gymaint o gymorth ag a allant a dylent allu darparu copi o'r daflen Byw gyda'r Dystiolaeth. Cofiwch na fydd modd iddynt drafod yr achos gyda chi.